650 வருடங்களுக்கு முன் சூளகிரியின் பெயர் அஸ்தகிரி ஓசூர் அறம் கிருஷ்ணன் அவர்கள் கொடுத்த தகவலின் படி கிருஷ்ணகிரி அருங்காட்சியகமும் கிருஷ்ணகிரி வரலாற்று ஆய்வு மற்றும் ஆவணப்படுத்தும் குழுவும் தலைவர் நாராயணமூர்த்தி அவர்களின் தலைமையில் சூளகிரி அருகே உள்ள மாரண்டபள்ளி பஞ்சாயத்தில் இருக்கும் தொட்டனூர் என்ற ஊரில் கோயில் நிலத்தில் உள்ள கல்வெட்டை படி எடுத்தோம் அந்த கல்வெட்டு பல புதிய தகவல்களை தருகிறது என அருங்காட்சிய காப்பாச்சியர் கோவிந்தராஜ் கூறினார். கோவில் நிலத்தில் இந்த கல்வெட்டு இன்னும் கிராமத்து மக்கள் மெட்டுக்கால் அப்ப பெருமாள் என்று வழிபட்டு வருகின்றனர். இந்த பெயரே 650 வருடங்கள் பழமையானது என்பது கல்வெட்டு வாயிலாக தெரிய வருகிறது. கல்வெட்டில் பெரிதாக சக்கரம் வரையப்பட்டுள்ளது அதன் இரண்டுபக்கமும் சந்திர சூரியனும் சக்கரத்தின் அருகே சங்கும் , குத்து விளக்கும் காணப்படுகிறது. இந்த பஞ்சாயத்தின் பெயரான மாராண்டப்பள்ளி 650 வருடங்களுக்கு முன் முடமாராண்டான்பள்ளி என்பதும் இக் கல்வெட்டு வாயிலாக தெரியவருகிறது. இதுவரை கிருண்ணகிரி மாவட்டத்தில் கண்டறியப்படாத பலகைவாவிபற்று விஜயநகர மன்னர் வீர கம்பன உடையார் காலத்தில் இருந்ததை கல்வெட்டு கூறுகிறது .பற்று என்பது நிர்வாக வசதிக்காக பிரிக்கப்பட்ட பகுதி தற்போதுள்ள தாலுக்கா போன்ற ஒரு பகுதி என்பது குறிப்பிடதக்கது. கல்வெட்டில் அஸ்தகிரியில் உள்ள வரதராச பெருமாள் கோவிலுக்கு கொடுக்கப்பட்ட தானத்தைப்பற்றி கூறுகிறது .தற்போதுள்ள சூளகிரி 650 வருடங்களுக்கு முன் அஸ்தகிரி என்று அழைக்கப்பட்டு வந்திருக்கிறது. தற்போதும் அந்த சூளகிரியில் கல்வெட்டில் குறிப்பிட்டுள்ள வரதராசபெருமாள் கோயில் உள்ளது. அஸ்தகிரி என்பது சூரியன் மறையும் மலை என்பதற்கு ஏற்ப வரதராசபெருமாள் கோவில் மேற்கு நோக்கி மலையின் மேற்கு பக்கம் இருப்பது குறிப்பிடதக்கது என்று கூறினார் இந்த ஆய்வுப்பணியில் சரவணக்குமார்ராமச்சந்திரன் , ஒருங்கிணைப்பாளர் தமிழ்செல்வன் , ஊரை சேர்ந்த மாரப்ப கவுடா ஆகிறோர் ஈடுபட்டனர்
